ਇਕ ਪਾਸੇ ਜਿਥੇ ਏਸ਼ੀਆ ਕੱਪ ਵਿੱਚ ਭਾਰਤੀ ਅਤੇ ਪਾਕਿਸਤਾਨੀ ਖਿਡਾਰੀਆਂ ਵਿਚਕਾਰ ਇਸ ਸਮੇਂ ਤਿੱਖਾ ਤਣਾਅ ਨਜ਼ਰ ਆ ਰਿਹਾ ਹੈ, ਉਥੇ ਹੀ ਦੂਜੇ ਪਾਸੇ ਭਾਰਤ ਅਤੇ ਪਾਕਿਸਤਾਨ ਦੇ ਦੋ ਪ੍ਰਮੁੱਖ ਖਿਡਾਰੀ ਇਕੱਠੇ ਖੇਡਣ ਲਈ ਤਿਆਰ ਹਨ। ਇਹ ਖਿਡਾਰੀ ਕੋਈ ਹੋਰ ਨਹੀਂ ਬਲਕਿ ਭਾਰਤ ਦੇ ਰਵੀਚੰਦਰਨ ਅਸ਼ਵਿਨ ਅਤੇ ਪਾਕਿਸਤਾਨ ਦੇ ਆਲਰਾਊਂਡਰ ਸ਼ਾਦਾਬ ਖਾਨ ਹਨ, ਜੋ ਬਿਗ ਬੈਸ਼ ਲੀਗ ਵਿੱਚ ਇੱਕੋ ਟੀਮ ਲਈ ਖੇਡਣਗੇ।

ਰਿਟਾਇਰਮੈਂਟ ਤੋਂ ਬਾਅਦ ਆਰ ਅਸ਼ਵਿਨ ਨੇ ਬਿਗ ਬੈਸ਼ ਲੀਗ ਦੀ ਟੀਮ ਸਿਡਨੀ ਥੰਡਰ ਨਾਲ ਕਰਾਰ ਕੀਤਾ ਹੈ ਅਤੇ ਸ਼ਾਦਾਬ ਖਾਨ ਵੀ ਇਸ ਟੀਮ ਦਾ ਮੈਂਬਰ ਹੈ। ਮਤਲਬ ਕਿ ਜਿਥੇ ਭਾਰਤੀ ਅਤੇ ਪਾਕਿਸਤਾਨੀ ਖਿਡਾਰੀ ਏਸ਼ੀਆ ਕੱਪ ਵਿੱਚ ਹੱਥ ਮਿਲਾਉਂਦੇ ਵੀ ਨਹੀਂ ਹਨ, ਭਾਰਤ ਅਤੇ ਪਾਕਿਸਤਾਨ ਦੇ ਇਹ ਦੋ ਖਿਡਾਰੀ ਹੁਣ ਹੱਥ ਮਿਲਾਉਂਦੇ ਅਤੇ ਸੰਭਾਵਤ ਤੌਰ ‘ਤੇ ਸੱਤ ਸਮੁੰਦਰ ਪਾਰ ਗਲੇ ਮਿਲਦੇ ਵੀ ਦਿਖਾਈ ਦੇਣਗੇ। ਪਾਕਿਸਤਾਨੀ ਮੀਡੀਆ ਨੇ ਇਸ ਖ਼ਬਰ ਨੂੰ ਹਾਈਪ ਕਰਨਾ ਸ਼ੁਰੂ ਕਰ ਦਿੱਤਾ ਹੈ ਕਿ ਭਾਰਤੀ ਅਤੇ ਪਾਕਿਸਤਾਨੀ ਖਿਡਾਰੀ ਹੁਣ ਇੱਕੋ ਟੀਮ ਲਈ ਖੇਡਣਗੇ।

ਅਸ਼ਵਿਨ ਸਿਡਨੀ ਥੰਡਰ ਨਾਲ ਜੁੜਿਆ

ਆਰ ਅਸ਼ਵਿਨ ਨੇ ਸਿਡਨੀ ਥੰਡਰ ਨਾਲ ਕਰਾਰ ਕੀਤਾ ਹੈ। ਫਰੈਂਚਾਇਜ਼ੀ ਨੇ ਵੀਰਵਾਰ ਨੂੰ ਅਧਿਕਾਰਤ ਐਲਾਨ ਕੀਤਾ। ਬਿਗ ਬੈਸ਼ ਲੀਗ ਦੇ ਅਧਿਕਾਰਤ ਹੈਂਡਲ ਨੇ ਖ਼ਬਰ ਪੋਸਟ ਕੀਤੀ ਕਿ ਅਸ਼ਵਿਨ ਡੇਵਿਡ ਵਾਰਨਰ ਦੀ ਕਪਤਾਨੀ ਵਾਲੀ ਸਿਡਨੀ ਥੰਡਰ ਨਾਲ ਜੁੜ ਗਿਆ ਹੈ। ਬਿਗ ਬੈਸ਼ ਲੀਗ ਨੇ ਆਪਣੀ ਪੋਸਟ ਵਿੱਚ ਲਿਖਿਆ, “ਬਿਗ ਬੈਸ਼ ਲੀਗ ਦੀ ਟੀਮ ਸਿਡਨੀ ਥੰਡਰ ਨੇ ਲੀਗ ਦੇ ਇਤਿਹਾਸ ਦੇ ਸਭ ਤੋਂ ਵੱਡੇ ਸੌਦਿਆਂ ਵਿੱਚੋਂ ਇੱਕ ‘ਤੇ ਦਸਤਖਤ ਕੀਤੇ ਹਨ। ਆਰ ਅਸ਼ਵਿਨ BBL 15 ਵਿੱਚ ਖੇਡਣਗੇ।”

ਸਿਡਨੀ ਥੰਡਰ ਦੇ ਚਾਰ ਵਿਦੇਸ਼ੀ ਖਿਡਾਰੀ ਹਨ

ਸਿਡਨੀ ਥੰਡਰ ਦੀ ਟੀਮ ਵਿੱਚ ਚਾਰ ਵਿਦੇਸ਼ੀ ਖਿਡਾਰੀ ਸ਼ਾਮਲ ਹਨ। ਇਨ੍ਹਾਂ ਵਿੱਚ ਇੰਗਲੈਂਡ ਦੇ ਸੈਮ ਬਿਲਿੰਗਸ, ਪਾਕਿਸਤਾਨ ਦੇ ਸ਼ਾਦਾਬ ਖਾਨ, ਨਿਊਜ਼ੀਲੈਂਡ ਦੇ ਲੋਕੀ ਫਰਗੂਸਨ ਅਤੇ ਹੁਣ ਭਾਰਤ ਦੇ ਆਰ ਅਸ਼ਵਿਨ ਸ਼ਾਮਲ ਹਨ। ਅਸ਼ਵਿਨ ਦਾ ਤਜਰਬਾ ਇਸ ਟੀਮ ਲਈ ਬਹੁਤ ਫਾਇਦੇਮੰਦ ਹੋ ਸਕਦਾ ਹੈ। ਟੀ-20 ਕ੍ਰਿਕਟ ਵਿੱਚ ਉਸਦਾ ਪ੍ਰਦਰਸ਼ਨ ਬੇਮਿਸਾਲ ਰਿਹਾ ਹੈ। ਅਸ਼ਵਿਨ ਕੋਲ 333 ਟੀ-20 ਮੈਚਾਂ ਦਾ ਤਜਰਬਾ ਹੈ, ਜਿਸ ਵਿੱਚ ਉਸਨੇ 317 ਵਿਕਟਾਂ ਲਈਆਂ ਹਨ। ਉਸਦਾ ਇਕਾਨਮੀ ਰੇਟ ਸਿਰਫ 7.11 ਹੈ। ਉਹ ਹੇਠਲੇ ਕ੍ਰਮ ਵਿੱਚ ਬੱਲੇ ਨਾਲ ਵੀ ਯੋਗਦਾਨ ਪਾ ਸਕਦਾ ਹੈ। ਇਹ ਦੇਖਣਾ ਦਿਲਚਸਪ ਹੋਵੇਗਾ ਕਿ ਉਹ ਪਾਕਿਸਤਾਨ ਦੇ ਆਲਰਾਊਂਡਰ ਸ਼ਾਦਾਬ ਖਾਨ ਨਾਲ ਕਿਵੇਂ ਗੱਲਬਾਤ ਕਰਦਾ ਹੈ।